meer oor ons

Play Video

Annelise stofberg

Op haar ouers se plaas in Namibië het Annelise vroeg reeds ‘n hart vir mense ontwikkel en die waarde van spanwerk, goeie maniere en respek geleer. Met haar optimistiese ingesteldheid sien sy altyd hoop in enige situasie en sy ontsien geen moeite om haar handewerk met uitnemendheid te merk nie. Net soos die kenners, glo Annelise dat jy weet jy is op die regte plek as jou werk nie na werk voel nie. Annelise se hart en hande is in elkeen van haar produkte vervleg en sy wèèt sy is op die regte plek.

Lien Koopman

Lien is sedert 2005 ‘n onmiskenbare deel van die Koekies en Beskuit familie en sy het reeds met die intrapslag ‘n wesenlike verskil gemaak aan die tòè oorwerkte span. Met haar netjiese en georganiseerde ingesteldheid het sy haar stempel op veral die verpakking van die produkte afgedruk. Daar is geen verpakkingsuitdaging wat sy nie kan baasraak nie – hetsy vir ‘n gastehuis, ‘n mark, in ‘n blikkie, drie koekies in ‘n pakkie – Lien kan dit doen!

Charmaine Carelse

Toe haar span haar die nodigste gehad het, het Charmaine ingespring en die voortou geneem met die mengery. Gou was dit duidelik dat haar hande vir meer as net mengery gemaak is en dat sy ook oor goeie organisatoriese vermoë beskik. Charmaine het binne ‘n kort tyd leiding begin neem met veral die beplanning van wat wanneer gedoen moet word en vandag kan die Koekies en Beskuit-span hulleself nie indink sonder haar nie.

Charlene Smit

Charlene se hande staan vir absoluut niks verkeerd nie. Sy is ‘n bobaas beskuitjie-fudge bakster en maak seker dat elke beslag ‘n sukses is. Daarmee saam is sy ook ‘n skoonmaker van formaat en vind sy vreugde daarin om haar sprankelskoon-stempel op elke area in die Koekies en Beskuit kombuis af te druk.

Sumari Karelse

Sumarie is Koekies en Beskuit se geheime bestandeel wanneer dit kom by uitmuntende kliënte diens. Sy is reeds sedert 2011 agter die stuur van die versending van produkte en met sorgvuldigheid sien sy toe dat elke kliënt se bestelling kraakvars en op tyd sy eindbestemming bereik.

denise SwartS

Sedert sy in 2018 by die Koekies en Beskuit-span aangesluit het, het Denise gewys sy is haar gewig in goud werd. Sy het in ‘n kort tydjie die kuns van insuur bemeester en in die proses ook haar niche gevind deur van elke Aartappelplantjie-beskuit beslag ‘n sukses te maak. Denise se hande is ook verantwoordelik vir ‘n goue gunsteling, die dadelballetjies, en sy verseker dat elke balletjie met liefde en presiesie gemeng, gerol en verpak word.

Mirna Wagenaar

In 2016 het die Koekies en Beskuit-span ‘n juweel ryker geword. Mirna was aanvanklik getaak met markte en aflewerings, maar danksy haar leergierige geaardheid het sy vinnig haar bekwaamheid in finansies en administrasie bewys. Sedertdien was haar harde werk, eerlikheid en integriteit van onskatbare waarde en is sy vandag ‘n staatmaker sekretaresse en formidabbele regterhand.

francina smit

Nog ‘n staatmaker in die span is Francina. Sy is ‘n vrou van vele talente wie se bereidwilligheid en behulpsaamheid in vele area’s van die span ‘n verskil maak. Nie net vat sy voor as dit by roosterkoeke kom nie, maar wanneer daar fees voorbereidings getref word of reggemaak word vir die uittog na ‘n mark, is Francina se bekwame hande altyd daar.

christelle vermeulen

Pas uit die skool het Christelle in 2011 by die span aangesluit. Met haar liefde vir bak en kosmaak, tesame met haar agtergrond in gasvryheid, het sy gou gewys sy is ‘n aanwins vir die span. In ‘n kort tyd het sy die drukkers baas geraak en vandag is sy ‘n spesialis as dit kom by die uitdruk van deeg. Daarmee saam is sy ook ‘n fudge fundi, en as dit druk gaan, berei sy ‘n meesterlike middagmaal!

saskia mentoor

Saskia is altyd ywerig om haar beste te lewer en nuwe vaardighede aan te leer. Uit haar hande kom die aller lekkerste vulsels waarmee die koekies met soveel sorg aanmekaar gesit word en sy het veral die immer gewilde koffiekoekies se vulsel vervolmaak. Met haar aansteeklike glimlag en positiewe ingesteldheid is Saskia ‘n geliefde lid van die span.

charlene koopman

Charlene sal deur baie beskryf word as die stil lid van die span, maar haar handewerk praat vir hulleself. Niemand kan kers vashou by die tempo waarteen sy die koekies opmekaar pas nie en deur haar voorbeeld motiveer en inspireer sy stil-stil haar Koekies en Beskuit kollega’s.

Charlotte Arendse

In 2014 het Charlotte aangesluit by die span en sedertdien het sy haarself as raakvatter bewys. Sy maak in elke afdeling ‘n verskil en geen taak is vir haar te groot of te klein nie. Of sy nou help om bestanddele af te weeg of die kuns van klapperys te vervolmaak, Charlotte se waarde is tasbaar.